„სკოლებში ფიზიკური აქტივობის მიზანმიმართული საკომუნიკაციო კამპანიების ნაკლებობაა“
საქართველოს პარლამენტში, ევროკავშირის მხარდაჭერით, ორი დღის განმავლობაში მიმდინარეობდა მულტისექტორული დისკუსია თემაზე – „ფიზიკური აქტივობის ხელშეწყობის ეროვნული სტრატეგია და სამოქმედო გეგმა 2023-2030”.
ითქვა, რომ დასმული საკითხების გადაწყვეტამ საბოლოოდ ქვეყანაში მოსახლეობის ყველა ასაკობრივი ჯგუფის მათ შორის სასკოლო ასაკის პირთა ფიზიკურ აქტივობას უნდა შეუწყოს ხელი, რასაც თავის მხრივ, არაგადამდები დაავადებების პრევენციისთვის განსაკუთრებული მნიშვნელობა ენიჭება, რადგან შემცირებული ფიზიკური აქტივობა არაგადამდები დაავადებების რისკფაქტორია. არაგადამდები დაავადებები კი, როგორც სხდომაზე აღინიშნა დღეს ავადობის, შრომისუუნარობის და სიკვდილიანობის მთავარი მიზეზია არა მარტო ჩვენს ქვეყანაში, არამედ გლობალურად.
ჯანმრთელობის დაცვისა და სოციალურ საკითხთა კომიტეტის თავმჯდომარის თქმით, არაგადამდები დაავადებების ტვირთი არა თუ ჯანდაცვის სისტემისთვის არის უმძიმესი, არამედ აზიანებს ქვეყნის ეკონომიკურ წინსვლასაც.
„ამ პროცესის შეჩერება კი ფიზიკურად აქტიური მოსახლეობის გარეშე წარმოუდგენელია. ურბანიზაციის პროცესმა, კერძო ტრანსპორტის რაოდენობის ზრდამ და ახალი ტექნოლოგიების გავრცელების მასშტაბებმა ხელი შეუწყო ფიზიკურად აქტიური ადამიანების რაოდენობის პროგრესულად შემცირებას. ამას ემატება მწვანე სივრცეების არაადეკვატური რაოდენობა ქალაქების მზარდ მოსახლეობასთან მიმართებით, სკოლებში ფიზიკური აქტივობის და სპორტის გაკვეთილების ინფრასტრუქტურული და ორგანიზაციული პრობლემები და მიზანმიმართული საკომუნიკაციო კამპანიების ნაკლებობა. შესაბამისად, ფიზიკური აქტივობის სფეროში ყოვლისმომცველი პოლიტიკის განხორციელების საჭიროება დგება. გვჭირდება ეფექტური პოლიტიკის განხორციელება მოსახლეობის ფიზიკური აქტივობის დონის ამაღლებისა და უმოქმედობის დონის შესამცირებლად“, – განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარე ზაზა ლომინაძემ.
