მკვლელობა გოგებაშვილის ქუჩაზე: დაკავებულს ბრალი წარუდგინეს
საქართველოს პროკურატურა “დამნაშავის შეპყრობისთვის აუცილებელი ზომის გადაცილებით მკვლელობას” ედავება დაცვის თანამშრომელს, რომელიც თბილისში, გოგებაშვილის ქუჩაზე მომხდარი მკვლელობის საქმეზე დააკავეს. მას სწორედ ზემოხსენებული მუხლით წარუდგინეს ბრალი.
მკვლელობა 4 მაისს მოხდა. გამოძიების ვერსიით, ბრალდებული[კ.კ.] იმყოფებოდა დასაცავი პირის ნათესავთან[გ.მ.], რა დროსაც ამ უკანასკნელს თავდამსხმელმა[გამოძიების ცნობით, ს.გ.] ცეცხლი გაუხსნა.
თავდასხმელს საპასუხო ცეცხლი გაუხსნა ბრალდებულმა, რის შედეგადაც თავდამსხმელი გარდაიცვალა.
ბრალდებული შინაგან საქმეთა სამინისტროს დაცვის პოლიციის დეპარტამენტის პირადი დაცვის სამმართველოს უფროსი ინსპექტორია.
“გოგებაშვილის ქუჩის გადამკვეთი, ბაშალეიშვილის ქუჩიდან მოულოდნელად გ.მ.-ს მიუახლოვდა ს.გ. და ცეცხლსასროლი იარაღიდან რამდენჯერმე ესროლა ფეხების მიმართულებით. მიღებული დაზიანებების შედეგად, გ.მ. ძირს დაეცა. ს.გ. მიუახლოვდა ძირს დაცემულ გ.მ.-ს და კვლავ განახორციელა გასროლა მისი ფეხების მიმართლებით. ს.გ.-მ გ.მ.-ს ყველა დაზიანება ქვედა კიდურების არეში მიაყენა, რის შემდგომ შემთხვევის ადგილიდან მიმალვა სცადა.
მიუხედავად იმისა, რომ ს.გ.-მ შეწყვიტა სროლა გ.მ.-ს მიმართულებით, დაცვის პოლიციის დეპარტამენტის პირადი დაცვის სამმართველოს უფროსმა ინსპექტორმა კ.კ.-მ, თანნაქონი „გლოკ 17“ მოდელის ცეცხლსაროლი იარაღიდან, დამნაშავის შეპყრობისათვის აუცილებელი ზომის გადაცილებით, რამდენჯერმე გაისროლა ს.გ.-ს მიმართულებით.
მიყენებული ჭრილობების შედეგად ს.გ. ადგილზე გარდაიცვალა.კ.კ.-ს ბრალდება დამნაშავის შეპყრობისთვის აუცილებელი ზომის გადაცილებით მკვლელობისათვის წარედგინა”, – წერია პროკურატურის განცხადებაში.
საქართველოს პროკურატურის თქმით, ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით, თბილისის საქალაქო სასამართლოს კანონით დადგენილ ვადაში მიმართავს.
