შეფასებისა და გამოცდების ეროვნული ცენტრი 2022-2023 სასწავლო წლის ეროვნული სასწავლო ოლიმპიადაში მონაწილე მოსწავლეებისა და სხვადასხვა ტურში გადამსვლელთა რიცხოვნობის შესახებ ინფორმაციას აქვეყნებს.
დღეს, 10 მარტს გავრცელებულ ინფორმაციაში აღნიშნულია, რომ ოლიმპიადის მთავარი მიზანი სასწავლო პროცესის სტიმულირება და მოსწავლეებისათვის მოტივაციის ამაღლებაა.
“ოლიმპიადის მესამე ტური 8 მარტს დაიწყო და 10 მარტს დასრულდება.
წელს ოლიმპიადაზე მოსწავლეთა აქტივობა მნიშვნელოვნად მაღალი იყო, თუ გასულ წელს ოლიმპიადის პირველ ტურში 31 900-ზე მეტი მოსწავლე მონაწილეობდა, ახლა კი 56 700-ზე მეტი მოზარდი ჩაერთო; მეორე ტურში – 9 000 -მდე მონაწილე გადავიდა, მესამე ტურში კი 604 მოსწავლე. მნიშვნელოვანია, რომ მათგან ზოგიერთი რამდენიმე საგანს აბარებს”, – აღნიშნულია სტატისტიკურ ინფორმაციაში.
გამოცდების ცენტრის ინფორმაციით, 2022-2023 სასწავლო წლის ეროვნული სასწავლო ოლიმპიადის გამარჯვებულია ის მოსწავლე, რომელიც დააგროვებს შესაბამისი საგნის ტესტის მაქსიმალური ქულის 60%-ს და მოხვდება შესაბამისი კლასისა და საგნის რეიტინგული სიის პირველ ათ მონაწილეს შორის.
შეგახსენებთ, რომ გამარჯვებულები ფასიანი საჩუქრებით დაჯილდოვდებიან და საერთაშორისო ოლიმპიადებში მიიღებენ მონაწილეობას საქართველოს სახელით.
ასევე იხილეთ:
Telegram: официальный канал СМИ newstbilisi.info
Facebook: официальная страница СМИ newstbilisi.info
