მარტვილში, წაჩხურუს მონასტერში დილიდან დაპირისპირებაა

28 აპრილის დილიდან მარტვილში, წაჩხურობაზე, წაჩხურუს მთავარანგელოზის ტაძარში დაპირისპირებაა.

თავდაპირველად, დილის 8 საათისთვის, დაპირისპირება დაიწყო „საპატრიარქოს ჩოხოსანთა საზოგადოების“ წევრებსა და განკვეთილი მიტროპოლიტიკის, პეტრე ცაავას მომხრეებს შორის.

„[დილის] სამი საათის მერე მოდიოდა ხალხის ნაკადი. ჩვენ ჩვეულებრივად ვემსახურებოდით, ვის რა უნდოდა, ხატებს ყიდულობდა ხალხი, სანთელს იძენდა. [„ჩოხოსნებმა“ და სტეფანეს მხარდამჭერებმა] ეს აგვიკრძალეს, აგვირიეს და აგვიყვარეს დახლებიდან“, – განუცხადა ჟურნალისტებს სალხინოს მამათა მონასტრის იღუმენმა, დანიელ გვილავამ.

დაპირისპირების კადრებს ავრცელებს ფეისბუკგვერდი, [მარტვილის] „ბალდის მონასტრის მრევლი“.

მოგვიანებით, ვითარების გამწვავება მოჰყვა წაჩხურუს მთავარანგელოზის სახელობის ტაძარში ჭყონდიდელი მიტროპოლიტის, სტეფანე კალაიჯიშვილის მისვლას.

იღუმენ დანიელის თქმით, ადგილობრივი სასულიერო პირები თანახმანი იყვნენ, რომ მიტროპოლიტი სტეფანე „მოსულიყო, ეწირა და წასულიყო“, მაგრამ:

„ეს არ ინებეს, ძალადობით, ჩვენი გაწყობილი ხატები დაგვირბიეს და გადაგვთელეს. ამის შემდეგ საკადრისი პასუხი გავეცით და შესაფერისი სახელი დავარქვით — იუდა“.

მარტვილის მრევლისა და სასულიერო პირების ნაწილი 2019 წლიდან არის დაპირისპირებული საპატრიარქოს და მის წარმომადგენლებს — დაპირისპირება უკავშირდება განყენებული მიტროპოლიტის, პეტრე ცაავას განცხადებას პატრიარქ ილია II-ის ჰომოსექსუალობაზე.

ადგილზე მობილიზებულია პოლიცია.

სამეგრელოში, მარტვილში, სოფელ წაჩხურუს მთავარანგელოზის ტაძარში წაჩხურობას ყოველწლიურად აღნიშნავენ – აღდგომის მომდევნო ხუთშაბათს. წაჩხურობას განსაკუთრებული მნიშვნელობა აქვს მოსახლეობის ნაწილისთვის, – ამ დღეს მრევლის ნაწილი ტაძარში აკვნებით ხელში მიდის და შვილების გაჩენისთვის ლოცულობს. წაჩხურობა სამეგრელოში ერთ-ერთი ყველაზე მრავალრიცხოვანი ღონისძიებაა.