უპრეცედენტო პროექტი გრუნიში
2022 წლის 15-17 ივნისს, პირველად საქართველოში, რამბამის (ისრაელი, ჰაიფა) სამედიცინო-სასწავლო ცენტრის მიერ განხორციელდა უპრეცედენტო პროექტი: „მასობრივი კატასტროფების მართვა პრეჰოსპიტალურ და პოსპიტალურ ეტაპზე“, რომელიც მიზნად ისახავდა საგანგებო სიტუაციების მართვაში ჩართული პერსონალისა და სტუდენტების პროფესიული უნარ-ჩვევების უწყვეტ განვითარებასა და გაღრმავებას, თანამედროვე მიღწევებზე დაფუძნებულ პრაქტიკულ სწავლებას.
მასობრივი კატასტროფების მართვის 3-დღიან სწავლებას ატარებდა რამბამის ტრავმაცენტრის ხელმძღვანელი, პროფესორი მიხეილ ჰელბერტალი და ტოპ ტრენერთა 5 -კაციანი ჯგუფი.
ტრენინგში მონაწილეობდნენ: საქართველოს გადაუდებელი სამედიცინო სამსახურისა და საგანგებო სიტუაციების მართვის პასუხისმგებელი პირები, ექიმები, ექთნები, მაშველები, პოლიციელები.
სწავლების პირველი დღე, მასობრივი კატასტროფების მართვა პრეჰოსპიტალურ ეტაპზე, გაიმართა გრიგოლ რობაქიძის სახელობის უნივერსიტეტში. პანელურ დისკუსიაზე უცხოელმა და ქართველმა მონაწილეებმა თავიანთი გამოცდილება გაუზიარეს ერთმანეთს, რომლის შემდეგ ქართველმა სპეციალისტებმა უნივერსიტეტის ეზოში წარმოადგინეს კატასტროფის სიმულაცია.
სწავლება გაგრძელდა სიმულაციის განხილვით, უცხოელმა ტრენერებმა დეტალურად ისაუბრეს და შეაფასეს შესრულებული ქმედებები და რჩევები მისცეს ქართველ კოლეგებს.
სწავლების მეორე დღე ამერიკულ ჰოსპიტალში – თბილისი, გაგრძელდა.
17 ივნისს გრუნიში გამართულ შეხვედრაზე უცხოელმა სტუმრებმა შეაჯამეს სამდღიანი სწავლება, მაღალი შეფასება მისცეს ქართველი სპეციალისტებიხს მომზადებას და მადლობა გადაუხადეს მასპინძლებს გულთბილი დახვედრისათვის.
ტრენინგის ყველა მონაწილეს გადაეცა საერთაშორისო სერტიფიკატი და მიენიჭა კრედიტქულები.
ტრენინგის ორგანიზატორები იყვნენ: ჯანდაცვის პროფესიონალთა ფონდი, გრიგოლ რობაქიძის სახელობის უნივერსიტეტი, ამერიკული ჰოსპიტალი თბილისი.
