ნინო წილოსანი: „ნარკოპოლიტიკის რეფორმა გაგრძელდება – მზადდება დამატებითი ცვლილებები და ინიციატივები“
25 ივნისი, 2025
საქართველოს პარლამენტის ვიცე-სპიკერმა ნინო წილოსანმა ხელისუფლების მიერ გაცხადებულ ნარკოპოლიტიკის კურსს კიდევ ერთხელ დაუჭირა მხარი და განაცხადა, რომ პრემიერ-მინისტრის მითითებების საფუძველზე ნარკოპოლიტიკის რეფორმა გაგრძელდება. მისივე თქმით, მოსალოდნელია დამატებითი საკანონმდებლო ინიციატივები და ცვლილებები.
„როგორც საგამოძიებო სისტემები მუშაობენ ძალიან ეფექტურად, ასევე ხელისუფლება და პრემიერ-მინისტრის გაცხადებული პოზიციით ვაგრძელებთ ნარკოპოლიტიკის რეფორმის განხორციელებას. მის ფარგლებში კიდევ იქნება წარმოდგენილი ცვლილებები და ინიციატივები, რომელმაც უნდა მოგვცეს სურათი, რომ ქვეყანაში ნარკოდანაშაულები და ნარკოტიკის მოხმარება მინიმუმამდე იყოს დაყვანილი და ჩვენი საზოგადოება მაქსიმალურად იყოს ჯანსაღი ცხოვრებისკენ მიმართული“, – განაცხადა წილოსანმა.
მისი კომენტარი გამოიკვეთა იმ ფონზე, როცა 24 ივნისს, გამთენიისას, შინაგან საქმეთა სამინისტროს მიერ თბილისსა და რამდენიმე რეგიონში ჩატარებული სპეცოპერაციის შედეგად 18 პირი დააკავეს ნარკოტიკულ დანაშაულებთან დაკავშირებულ ბრალდებებზე.
შს მინისტრის, გეკა გელაძის განცხადებით, მიმდინარე ოპერაციები ემსახურება ნარკოტიკების გავრცელების პრევენციას და უკვე მიგვანიშნებს იმაზე, რომ სამართალდამცავ სტრუქტურებს ამ მიმართულებით გააქტიურებული სტრატეგია აქვთ.
საქართველოს ხელისუფლების მიერ დაწყებული ნარკოპოლიტიკის რეფორმა ითვალისწინებს როგორც სისტემური პრევენციული მიდგომების გაძლიერებას, ისე სისხლის სამართლის კოდექსში ცვლილებებს, რომლებიც მიზნად ისახავს განსაკუთრებით მძიმე ნარკოტიკების მოხმარებისა და გავრცელების მკაცრ აღკვეთას.
